Taittiriya – Pratishakhayam [Original – text:]

Description

वैदिकवाङ्मये कृष्णयजुर्वेदीयायाः संहितायाः स्वकीयं वैशिष्ट्यं वर्त्तत इति नातिरोहितं विदुषाम्। इयं संहिता प्रायेण दाक्षिणात्यैरभ्यस्यते। दक्षिणापथ एवास्याः संस्करणान्यपि यथाकालं प्रकाशितानि । पञ्चत्रिंशद्भ्यो वर्षेभ्यः प्राग् एषा संहिता तदध्येतृणां दुर्लभतां गता। ततो रामलालकपूरन्यासा- ध्यक्षा महामहोपाध्यायाः श्रीयुधिष्ठिरमीमांसकमहाभागा बहुभिस्तैत्तिरीयशाखा- ध्येतृभिः प्रार्थ्यमाना महता परिश्रमेण श्रीश्रीपाददामोदरसातवलेकरसंस्करणं २०३९तमे वैक्रमाब्दे प्रतिकृतिमार्गेणैतां संहितां प्राकाशयन्त। तस्मिन्नेवान्तराले तैत्तिरीयसंहितायाः पदपाठोऽपि दुर्लभतां गतः। तस्य प्रकाशनाय पुनः श्रद्धेयाः श्रीमीमांसकचरणाः प्रार्थिता दाक्षिणात्यैस्तैत्तिरीयशाखाध्यायिभिः। श्रीमीमांसकमहाभागाः स्वकीयसुहृद्वरैः श्रौतिपुङ्गवैनैल्लूरुवासिभिर्विश्वनाथ- महाभागैः सह सम्पर्क व्यधिषत। श्रीविश्वनाथमहाभागास्तैत्तिरीयपदपाठस्य कुम्भघोणसंस्करणस्य स्वकीयं ग्रन्थं श्रीमीमांसकेभ्यः समर्पयन्त। ततः स जीर्णत्वाद् न कृतकारीति विज्ञाय श्रौतिनः श्रीविश्वनाथाः शिमोगानिवासि- श्रीकेशवमूर्तिमहाभागान् तत्संस्करणप्रेषणाय प्रैरयन्। तदेवं ग्रन्थद्वयसाहाय्येन प्रतिकृतिमुद्धृत्य तैत्तिरीयपदपाठप्रकाशने श्रद्धेयाः श्रीयुधिष्ठिरमीमांसकाः सफला अभूवन्।